22 September 2009

بعض كلمات نعناع الجنينة


قالتلى بريدك يا ولد عمى
تعالى دوق العسل سايل على فمى
على مهلك على ما بحمل الضمى
على مهلك على دة انا حيلة ابوى وامى
نعناع الجنينة المسقى فى حيضانة
شجر الموز طرح ضلل على عيدانة
***
فى عشق البنات انا فقت نابليون
طرمبيلى وقف عجلاتة بندريوم
قدمت شكوتى لحاكم الخرطوم
اجل جلستى لما القيامة تقوم
***
سألت ايش الاسم قالو البنات نعمات
ام صبعين رطاب والباقى بلح امهات
يوم ندهت علينا بيدها الناعمات
قلت نعمين تلاتة واربع خمس نعمات
***
خضارك زى جنينة وطرحت تينات
عودك فى مشيتة عاملّو منحنيات
عضامك لينة لايقين على التنيات
تانية واتنين تلاتة واربع خمس تنيات
***
يا ام عقدين دهب تلاتة وتلاتين طارة
ما عيناً رأت ما وردت على بكارة
يوم طلت علينا الكل وقعو سكارى
سقطت فى الحليب ما بينتلو عكارة
***
يا ست البنات ماحلى الجمال الفيكي
مهما اعمل واسوّي ف الوصف ما يكفيكي
الروح والجسد تاخدي وما يكفيكي
بسْ خلي العيون علشان تعاين فيكي
***
رايد اكلمك كل ساعة ف وَسَعتنا
من بعد الضُهُر نركب ضهَر ناقتنا
قالت نعمل ايه لو العرب شافتنا
قولي وليد عمي وساقته جار ساقتنا
***
قالت تَقصُد ايه يا اللي انت بتغازَلنا
واقف في طريقنا ان كان طلعنا نزَلنا
مواعدين بعضَنا من صغرَنا وما زلنا
ما نفوت بعضنا حتى التراب يعزلنا
***
نعناع الجنينة المسقي في حيضانه
شجر الموز طرح ضلل على عيدانه
***
قالت تَقصُد ايه يا اللي انت بتغازَلنا
واقف في طريقنا ان طلعنا نزَلنا
صاينين عهدنا من صغرنا ولا زلنا
إوصلنا حبيبنا ألا الفراق يعزلنا
***
يا خولي الجنينة الفاكهة فيها أشكال
عنقود العنب على شجره طل ومال
والتين الخضّير من سحره بقى رمان
قوم الحق يا خولي ده أنا اللي قلبي مال
***
نعناع الجنينة عطرك فريد يتغنى
وصفوك للحبايب من روايح الجنة
والماشي معاك يحلم يا ناس يتمنى
وان ضاع عمري ضاع مايهمنيش أتهنى
***
والعنب البناتي طالل على المحبوبة
واللي داقه مرة ما يعرف أبدا توبة
ويعود له تاني النوبة بعد النوبة
ما دامت قسمته على الجبين مكتوبة
***
يا خولي الجنينة عندي طلب وسؤال
تعيني في جناينك أزرع يروق الحال
وبستانك الزاد ومايهمنيش المال
ولا السكن والهدمة مادم فيه راحة البال
***
تلتك من دهب تلتك من الفيروز
تلتك من عقيق من مكة جاني مفروز
لوين نويتي الرحيل يا نور عيوني الجوز
باصرخ من قليبي والله الفراق ما يجوز
***
يا رايد الجمال قبّل على الخرطوم
تلقى هناك بنات كيف السمك بيعوم
أما بناتك يا***فوسطهم مبروم
يحنوا للغريب وابن البلد *****
***

راكبة الأوتومبيل في اسكندرية تصيف
لابسة قميص النوم لونه برتقاني خفيف
جننتي الخواجة قلبه الكُفر متكيف
وإيش حالي أنا المسلم اللي قلبي رهيف
***
يا ست البنات على ايه ما انتي نويتي
عايني وأنظري كيف الشباب سويتي
جننتي قلوب والعيون بكيتي
حرام أكبر حرام جرحتي وللا داويتي
***
نعناع الجنينة المسقي في حيضانه
يوم سافر حبيبي سبت البلد علشانه
***
نزل الوز عام فى ليل مضلم هاسى
قلت أنا أعوم وراكى يالى جمال ميراسى
قالت لى تعوم وراى أنا عارفة من أحساسك
موجنا تقيل عليك تغرق تزعل ناسك
***
جالت يابا يابا ريت هناك خياله
تسعين ناجه لجح والرجال شياله
جلتلها عريسك جانى فى الجياله
ارفضله طلب ولا انتى ليه مياله
***
يا شاغل جليبى ليلى ويا نهارى
اطلعلك على راس النخيل والصارى
واطولك منين شبكتنى فى عزالى
بيراهنو عليك انك حتفضل ناري

15 September 2009

الافتكاسة الثانية...احترس

في الافتكاسة السابقة تحدثنا عن الاغبياء الاكثر انتشارا من عدد السكان اساسا المرة دي هنتكلم بموجز بسيط عن مجموعة اغرب واكثر انتشارا واكثر خطرا علينا وعلى اللي خلفونا...انهم المدعين ..
المدعين المنتشرين في كل الانحاء .. مدعين الشرف ومدعين البراءة ومدعين الثقافة و الفن ومدعين الوطنية والمثل العليا هناخد مثال صغير مثلا تجمع بعض المدعين وهم من مدعين الفن والثقافة... انهم رواد مقهى التجارية في الاسكندرية المليء لدرجة انه بيدلدق من الناس دي قد تجبرك الظروف على دخول التجارية مع احد الاصدقاء وقد تذهب لمقابلة شخص ما ولكن يجب عليك ان تأخذ حذرك فالمشاركة في الحديث قد تؤذيك نفسيا والاستماع قد يؤذيك ايضا ف حرصا على سلامتك وسلامة الاخرين لا تذهب او حاول ان تذهب وانت ترتدي الواقي اقترح ان تكون الاماكن المليئة بالمجموعات دي والمعروفة لدينا جميعا ان توضع تحذير على الباب (احترس من المدعين) زي احترس من الكلاب كدة مع الاعتذار للكلاب طبعا..نلتقي في الافتكاسة القادمة

وأشرب سجاير

دخلت غرفة التدخين الزجاجية في مكان عملي (وحيث ان من الاسباب القوية اللي كرهتني في المدينة دي منعهم للتدخين في كل مكان) واشعلت سيجارة وجلست على كرسي مسترخيا...لفت نظري شخص بجانبي نحيف الجسم وخمري اللون وناعم الشعر و يشع الذكاء من عينيه العسليتين و يجلس واضعا رجل على الاخرى ...
بعفوية منى قلتله (جود مورنينج) على اساس ان من الاغلب ان الجميع يتحدث الانجليزية ... رد علية بسؤال كان يراهن على اجابته مع نفسه وقالي : انت بتتكلم عربي ؟؟ شكلك عربي ؟؟قلتله ايوة انا من مصر .. قرب كرسيه وبفرح زي الاطفال وقالي وانا من الاردن ..اخيرا حد بيتكلم عربي!!
وبدأنا بالتعارف والتحدث عن المدينة والخ الخبعد لحظات من الصمت اشعلنا السيجارة الثالثة تقريبا وبعد ان تغير موده الى الحزن وفاجأني بقوله : انا مش طماع على فكرة اترسم على وشي الاستفهام وسبته يكمل ... قال: انا مش طماع واللهي انا مش جاي البلد دي عشان فلوس كتيرة ولا عربية شبه .الطيارة ولا عايز اسكن في فيلا ولا عايز كل اللي بيحلم بيه الناس كلها اللي هنا .. استغربت وشكيت في حالته النفسبة والعقلية بدأ يتكلم تاني وقال : انا ماطلبتش كتير على فكرة انا بس نفسي اشتغل شغلانة محترمة ومش عايز مرتب عالي بس عايز مرتب يكفيني اعيش وخلاص ..
ونفسي اسكن في مكان بسيط فيه الحاجات البسيطة اللي بحبها....ونفسي في بنت جميلة احبها و تحبني .. انا مش طماع واللهي مش طماع ماعتقدش انه كتير علية وكانت عينه بدات تلمع وكأنه هيبكي ... وسكت شوية وقال : اه ونفسي كمان اقعد القعدة دي وانا دماغي رايقة .... واشرب سجاير

04 September 2009




بعيدا عن الشبابيك وبعيدا عن وسط الدايرة وبعيدا عن جو الثمانينات وبعيدا عن رأي شياب المنتديات الهبلة اصحاب مظاهرات الكنج هو الكنج ولو كره الكافرون.... ورأي مجتمع المثقفين المدعين اللي بيقولوا فين العمق والفكرة وان منير وقف عند التمانيناتطعم البيوت له حق الاحترام وله حق الاستماع بعد غياب من ابونا محمد منير وبعد غياب عن تقديم شيء مختلف منهبكل بساطة انا استمتعت بطعم البيوت ... وجميل انه بعد غياب ثلات سنين ماقدمش حادثة زي شريط امبارح كان عمرى تلاتينالاقرب الى قلبي يونس... من غير كسوف ... مش محتاج اتوب.. والباقي لم يبتعد كثيرا

تمهيدا للفوكسيات

هنبدأ على فترات وضع مجموعة من المبادئ الهدامة منها او البنائة في محاولة لتوضيح بعض وجهات النظر و تحت شعار نحن مازلنا نبحث عن الضحكسنبدأ العالم الان ماهو الا عبارة عن مجموعة من الاغبياء فالاغبياء اصبحوا اكثر من سكان شعب الارض .. حاول ان تتلفت حولك وحاول ان تنظر الى من حولك وحاول ان تختار عينة من عشرة اشخاص مذكرين او مؤنثين ستجد ان عدد الاغبياء قد يزيد عن عدد العينة نفسهاعندما تكون وحيدا في غرفتك فانت الوحيد اموجود فيها قد تبحث عن الاغبياء .. فانت لا تتوقع انك منهم .. ولكن يشاء القدر ان تقف امام المراية للحظات وتفكر قليلا ثم تكتشف انك الغبي الوحيد داخل هذه الغرفة

01 January 2007


في ليلة راس السنة وقبل الساعة 12 وبداية السنة الجديدة
كنت ماشي لوحدى ...قابلت صديق
قاللي: افتح ايدك
ولما فتحت ايدي
حطلي شوية صواريخ من بتوع العيد
كنت كل ما اقابل حد من صحابي اديله صاروخ .. ويولعه واتفرج عليه وهو بيفرقع
لغاية ما فضل معايا صاروخ واحد بس ولما ولعته ورميته عشان اتفرج عليه ...للأسف مافرقعش

14 October 2006

الملل يتحدى ميلودي


من فترة قريبة ظهرت اعلانات ميلودي تتحدى الملل اللى انا شايفها جميلة جدا ومعبرة ببطولة الراجل التخين اللي لابس اصفر
واللي كان بيكافح الملل في اماكن ومواقف مختلفة يمكن عنيفة شوية او كوميدية شوية بس في الاخر بتوصل فكرة مكافحة الملل

بس ياريت الملل اللي في حياتنا واللي انتشر اليومين دول واللي محاصرني من البر والبحر والجو ياريت يكون بالظرف ده والهبالة دي ماكانش حد غلب ... بس للاسف الاملل المنتشر اليومين دول من النوع اللي بيطارد واللي بيدخل من الشباك واللي بينزل من الحنفية واللي بيتسرب من تحت عقب الباب زي الفيران والصراصير ومن النوع اللي صعب يتمسك ويتحصر في حاجة معينة او تلاقيله علاج فعال يتعامل معاه ويكافحه

فكرة الملل وفكرة اعلان ميلودي وسعوا الخيال واحتياج الراجل اللي لابس اصفر في الحياة الحقيقية
مديري السابق في حوار اكتر من ممل بيقولي:على فكرة احنا بعد كدة مافيش حاجة اسمها مواعيد عمل ...العمل عبارة عن 24 ساعة وتبقى جاهز ومستعد لأي اتصال في اي معاد احتاجك فيه الخ الخ...واللي انتهى معاه الحوار انه يشوفلوا اي عبد تاني يبقى مهندس مكاني
في الوقت اللي هو كان بيتكلم فيه كنت انا سرحان وعيني متجهة ناحية الشباك ومستني الراجل اللي لابس اصفر يدخل ويخلص الليلة دي ويخلصنا منه

ده موقف بسيط وممل وبيتكرر وبيحصل و هيفضل يحصل .. لما نجمع ونحاول نحصر الاسباب اللي بتجيب الملل ...لما تنزل الشارع ولما تروح شغلك او الكلية او المدرسة أو.. أو... أو.. الخ هنلاقي انها لاتعد ولا تحصى يبقى احنا محتاجين الراجل اياه

هتتعب معانا واللهي يا ابو لبس اصفر

07 October 2006

فتحي سلامة .. مؤيدين ومعارضين


حضرت حفلتين في اسبوع واحد للعظيم فتحي سلامة
الاولى في مركز الابداع والتانية في الجيزويت ... احترامي وتقديري للشخص ده على اللي بيقدمه وعلى احترامه
اشتركت معاه قبل كدة في ورشة وكانت اكتر من جميلة ومفيدة
منورنا واللهي يا فتحي في اسكندرية

04 April 2006

دعوة للشر


وداعا للعلاقات البريئة

ووداعا للتعاملات النظيفة

ووداعا للصداقات المبنية على الثقة والتفاهم والخ الخ


وتحية خاصة للتمثيل والاصتناع والكذب لمجرد الكذب




06 January 2006

شخص ما في الجوار


مش عارف ليه عندي احساس غريب ان في شخص ما بيراقبني وبيتابعني
شخص ما بدون ملامح معروفة عندي وبدون هوية وبدون تحديد ذكوريته او انوثته
لكن حاسس بيه .. وحاسس ان في عين او عيون بتراقبني
تولدت عندي حالة التلفت اللاتلقائي لعل وعسى الاقيه فجأة
تولدت عندي حالة متابعة عيون الناس في المحيط اللي اتواجد فيه ...ولقيت فيها حاجات تبرر احساسي بالمراقبة
لقيت نظرات غريبة بعضها بيفسر المحبة والاعجاب وبعضها بيفسر الكراهية الغير مفهومة الاسباب
يمكن دول اللي بيراقبوني؟؟؟ ويمكن انا بيتهيألي ؟؟؟ ويمكن في شخص تاني مقصود بالنظرات دي وانا باتخيل انا موجهة عندي
بس انا كدة هتجنن .. امش لوحدي بالليل متجه للبيت اتخيل صوت شخص ماشي ورايا ..أقف ..والتفت بسرعة ..تتطلع قطة بتفتش في كيس مرمي في الشارع بتحاول تتطلع منه اكل..اضحك واكمل مشي
بنت جميلة بترمي نظرة اعجاب وابتسامة مكسوفة ... اخيرا عرفتك انتى اللي بتراقبيني..التفت ورايا يمكن يكون شخص تاني...للاسف فعلا الاقي المحظوظ اللي كان المقصود ... وانا كنت كبري
يمكن يكون عفريت .. طب والعفريت ده عايز ايه يعني ..فاضي مثلا عشان يضيع وقته معايا
بس انا متأكد ان في شخص ما بيراقبني

لحظة

طب مين اساسا مهتم انه يراقب او يتابع الشخص الهزيل المنكوش...وهيستفيد ايه .. وهيوصل لايه بعد كل ده

طب والحل؟؟؟

تقريبا ده جزء مني او شخصية من شخصياتي أو عادة من عاداتي اللي اعدمتهم عادت لتنتقم...... أو يمكن تتطمن علية

اعتقد انه لم يبقى كثيرا على الجنون ...فاضل كام كيلو بس

23 November 2005

النهاردة 23

النهاردة 23 من شهر 11 اللي معروف باسم نوفمبر
والنهاردة انا كدة بقالي 23 سنة في الدنيا الغريبة العجيبة دي
الغريب ان السنة دي بالذات مش ستني من حد يقولي كل سنة وانت طيب بحس انها كلمة مش مفهومة او مش معبرة ولكن بتعبرلي ان في حد فاكر تاريخ ميلادي ودي حاجة كويسة بالنسبة للزمن اللي احنا مرميين فيه
الطريف في الموضوع ان انا مش عارف سن ال 23 ده بيتعمل فيه بالظبط يعني ايه المكان او الوظيفة اللي لازم اقوم بيها وانا في سن 23 واساسا انا مش باعترف برقم تلاتة من الاصل لانه بيفكرني بيوم التلات اللي انا مش عارف ايه لازمته في الاسبوع وعمره ماكان في يوم تلات سعيد...
في كل يوم لازم افتكر موقف حصل..ذكرى حلوة أو سيئة كل اللي بعمله اني باتكلم عن ذكرياتي بالفعل الماضي تقريبا عمري مابحاولش اصنع اكتر او احس ان في مستقبل بل انه بالنسبة ليه شيء مجهول ولا اهتم اني اتكلم عنه أو احس ان لسة في أيام هتيجي تاني
لما باقف قدام المراية للحظات باحس اني شايف شخصين عايشين مع بعض واحد منهم عجوز ومكحكح وعاش الدنيا بالطول والعرض والارتفاع وعمل كل حاجة نفسه فيها وعنده كمية لا بأس بها من الحكمة وكمية كبيرة من الخبرة واكتفى من الدنيا ومش عايز يعمل حاجة تاني
والتاني طفل صغير يمكن لسة ماكملش الست سنين نفسه يكبر ويحلم ويحب ويعيش الحياة وعنده أمل في بكرة وشايل كمية لابأس بها من البراءة والسذاجة في نفس الوقت
في حين ان هناك اختفاء تام للشخص اللي يفترض انه يكون حقيقي وهو الشخص اللي في العشرينات
مش عارف ازاي بيت يبقى عايش فيه راجل عجوز عنده ستين وطفل صغير عنده ستة بس طب هيتفاهموا مع بعض ازاي
العجوز بيحسد الطفل وبيتمنى انه يرجع لزمان تاني والطفل نفسه يكبر عشان يعيش الدنيا ويتخلص من قيود الطفولة
واللي في النص مرحلة مختفية وتايهة او غير موجودة على الارجح


ويبقى السؤال : ايه اللي بيتعمل في ال 23 أو يعني ايه 23 اساسا ؟؟

06 November 2005

قلمي ومثلثي ولوحة


Milling Spindle
من زمان مارسمتش لوحة هسلمها بروقان
المرة دي رسمت وصورتها يمكن تكون اخر مرة وتكون اخر سنة في الهندسة
ومعاها
قلمي الاصفر ...عشرة خمس سنين
الارسطو الازرق ... عشرة اربع سنين
المساحة ... مش بتاعتي

04 November 2005

الشحات الملحد...

في ليلة العيد مش عارف ايه اللي بيحصل ناس سعيدة ومعاها فلوس كتير وناس بائسة ومعهاش تمن رغيف عيش وناس مرميين عاقهوة مش فارقة معاهم لا عيد ولا حسين

وانا من الناس اللي مرميين على القهوة ووبما انها ليلة عيد يبقى لازم موقف ومش عارف ليه مواقف الشحاتين بتيجي معايا سكة

لقيت ولد صغير مايزيدش عمره عن ال 11 سنة بيقرب مني وبيقولي
أي حاجة يا بيه .. كل سنة وانت طيب ؟؟

قلتله اولا انا مش بيه ..ثانيا وانت طيب .. ثالثا ربنا يسهلك

اخر حاجة كنت اتوقعها من الطفل ده انه بعد ماسمع ربنا يسهلك

وقف وقال بصوت عالي ..... ربنا ربناا ... ربناا هو مفيش غير ربنا ده

صاحبي الظريف رد عليه وقاله ..خلاص ياعم بلاش ربنا

!!!!! محسن يسهلك

فينك ياحمكشة كنت قلتله ستروس يسهلك



14 October 2005

صاحبي دخل الدولاب!!

صاحبي دخل الدولاب
دي كانت ايجابتي لما سألني واحد من صحاب الكلية لما كنا متجمعين في تجمع ماتكررش من زمن ....وقالي هو فلان فين من زمان
استغرب يعني ايه دخل الدولاب؟؟؟
رديت انه حاليا بيروح دروس دينية وبيصلي في الجامع وبيصوم اتنين وخميس وبيروح الجيم عشان يبني جسمه وبيدور على عروسة محجبة وبيضة عشان يعف نفسه ده غير انه بطل يقعد في القهوة وبطل يتعامل معايا شخصيا لانه بيعتبرني شخص فاسق تقريبا ده غير انه لما بيتعامل معايا بيبقى لمجرد انه ينتقدني ولأي سبب
كانت طريقتي في الكلام تهكمية وكأني مش عاجبني الحال اللي هو فيه..واني متحامل عليه
استغرب صاحبي ورد يااه ربنا يهديه ...فاكر ده كان ايه زمان
ماكنتش مستني انه يقولي فاكر عشان افتكر الشخص ... وبداية معرفتي بيه من 6 سنين وبداية اكتشافي ليه وانه كان كل اهتماماته البحث عن متعته الشخصية سواء اكل وشرب او جنس
رغم انه معروف انه قلبه ابيض و طيب وابن حلال ... وماله لما كل يوم يبقى مع واحدة وماله لما كل اهتمماماته انه يوصل للي هو عايزه حتى لو كانت محترمة وبنت ناس..في نظره كل البنات زي بعض وان كل واحدة جواها عاهرة صغيرة محتاجة اللي يكبرها ويراعيها
في كل الحالات كنت انا صاحبه المقرب وكنا رغم الاختلافات كان فيه الاتفاقات حتى في الغلط
وبعد فترة انتقالية صغيرة ... قرر انه يدخل الدولاب
وطبعا اهل الدولاب هما شعب الله المختار وهما الصح المطلق وهما الجيل الجديد من الصحابة والتابعين
واللي مش زيهم يبقى كأنه غير موجود ويمنع التعامل معه لانه فيه سم قاتل .... ويرجى الابتعاد عنه لانه يحتوي على مواد سريعة الاشتعال
من فترة اتفتحت مناقشة بيني وبينه استمرت لمدة 3 ساعات كان بدايتها
اني قلت اني معترض على الجواز عن طريق الصالونات وانه طريقة حيوانية اني اروح اتفرج على واحدة وبعد كدة اقول لاهلي عجبتني .. ويدفعوا تمنها ويجيبوها .. وانها اشبه بطريقة توليف الكلاب وتلعيب ديولهم لبعض
كدة انا ف نظرهم اني معادي للاسلام وان الرسول عليه الصلاة والسلام أمر بالجواز بالطريقة دي وان الصحابة اتجوزوا بالطريقة دي وطبعا مش من حقنا اننا كمسلمين اننا نعمل غير كدة .. وانتهت المناقشة على اني شيوعي وملحد وعدو للاخلاق والقيم
من كام يوم قامت بيني وبينه مشادة بعصبية اتجهت الى مناقشة من طرف واحد وفتحت عليه النار
لمجرد انه اعترض عليا لاني شتمت واحد صاحبي ... استغليتها فرصة ومسكت انا خيوط الكلام بصوت عالي لمجرد اني اوصل رأي الشخصي
وهو انه غبي
ايه اللي يخليني اخسر صديق كان مقرب ليه لمجرد انه بيشتم او بيحب المزيكا او حتى بيحيب مغامرات الجنس الناعم
مافيش استعداد يفهم ان في حاجة اسمها حرية شخصية وان كل واحد حر في نفسه مالم يضر
للاسف اني لغاية الوقت الحالي مش عارف مين فينا اللي صح
لكن اللي اعرفه ان الاسلام ماحولش الحياة لصلاة وصوم واكل وشرب وجواز

يمكن تكون دي سنة الحياة وان كل واحد لازم يتجه في اتجاه ..لكن في الاخر كل انسان مسؤول عن نفسه وليه حرية انه يعيش زي مايحب

ومش من حق اي انسان تاني انه يتدخل في حياة شخص
سواء من برة أو جوة الدولاب

19 September 2005

تفسير منطقي



كل مخ فيه اربعة سلتبيس
اتنين بتوع مصر واتنين بتوع تايوان
الاتنين بتوع مصر بيدو عسل وطحينة
والاتنين بتوع تايوان بيدو كهربا ومغناطيس
عسل وطحينة على كهربا ومغناطيس في المخ مع بعض بيعملوا حالة يخلوك كل ماتشوف حمار تقول أخووييااااا
.......................
عادل امام
في مسرحية الواد سيد الشغال

11 September 2005

مبروك علينا ست سنين كمان



أحب ابارك لبابا حنني على فترة رئاسة جديدة على العزبة المعروفة باسم مصر و أحب أحيي الشعب المصري اللي اختاره لفترة جديدة
....
يوم الانتخابات صحيت الصبح على غير العادة على صوت مزعج من عربية نص نقل مركبة ميكرفون ومشغلة اغنية ـ اخترناك وبايعناك ومش عارف ايه ـ كانت واقفة تحت البلكونة كانهم مصممين يصحوني .. الله يلعن ابوكو على ابو الانتخابات على أبو صاحب الليلة دي كلها... ماعرفتش انام تاني بعد كزا محاولة ... غيرت هدومي ونزلت قابلت مجموعة من الاصدقاء استغربوا اني اظهر الصبح ... قلتلهم على السبب بتاع العربية النص نقل وحاولت ااخد الموضوع بكوميديا وقلتلهم واقفين تحت بلكونتي ومشغلين اخترناك وبايعناك , مع اني مارشحتش نفسي
أنا عن نفسي كنت مقرر اني هعتبر يوم الانتخابات زي اي يوم عادي وبكل برود وسلبية هعيشه كدة ولا كأن في حاجة
مع اني كنت شايف مظاهر التهييس والهرجلة في شوارع اسكندرية بطريقة غبية
..
وبعد يومين عرفت ان مبارك كسب الانتخابات أو اكتسح بمعنى اصح .. ماعرفش ليه اتخنقت وفكرت في اللي كنت عايزه
كنت مش عايز مبارك مش عشان أنا بكرهه كشخص أو عشان انا بفضل واحد تاني
بس كنت باحلم بالتغيير اللي ماعرفش كان ممكن يحصل أو لا
بس كان نفسي اني لما اروح اشتري حاجة بسيطة مالاقيش عليها ضعف تمنها ضرايب
ونفسي لما امش في الشارع مالاقيش الناس شايلة هموم ومكشرة ومتنكدة بسبب قلة الحيلة وبسبب حاجات كتير
ونفسي لما احب أسافر أي بلد وأدخل باب أي لسفارة يتعاملو معاية على أني شخص مش يخافوا ويشكوا فيا ويعتبروني حاجة هتضر بلدهم
ونفسي لما أي حد نفسه يعمل حاجة هيبقى مبسوط بيها يعملها مش يلاقي كل الظروف .المادية والاجتماعية والسياسية بتمنعه وبتقف ضده رغم ان اي شخص في اي بلد ممكن يعملها ويبقى متميز فيها
ونفسي مالاقيش واحد متخرج ومعاه شهادة جامعية بس بيشتغل قهوجي لمجرد انه مش لاقي شغل
ونفسي ونفسي ونفسي
ماعرفش شوية الحاجات البسيطة والخيالية دي محتاجة رئيس جمهورية انسان ولا محتاجة ملاك هو اللي يكون مسؤول
ولا محتاجة اننا نكون احنا اللي مسؤولين عن نفسنا
...في الاخر الواقع هو الواقع واحنا هنفضل احنا مع مبارك ولا مع عفريت مصباح علاء الدين
............
كلمة واقعية
...
الحارة اللي مافهاش فتوة تبقى زي المرة اللي مالهاش راجل
تحية كاريوكا
..........................................................................
كلمة عجبتني
...
احنا لو عملنا استفتاء على وجود ربنا مش هياخد نتيجة 88,5% من اللي بيقولو نعم
احمد رجب
..........................................................................
كلمة ضحكتني واحنا في القهوة
...
واحد نام زي أهل الكهف وصحي سنة 2050 طبعا ماكانش فاهم وكان عايز يعرف ايه اللي بيحصل في الدنيا
قعد يقلب في الراديو .. وصل لقناة الشرق الاوسط . سمع خبر القوات السودانية تحتل الاراضي الانجليزية وتسيطر على الحكم
استغرب واتعجب ... قلب كمان وكمان سمع خبر ان الفلسطينين بيتحكموا في اسعار السوق الدولية...استغرب واتعجب وقال هي الدنيا اتغيرت واتشقلبت كدة ليه
وصل لغاية قناة مصر قال اسوف مصر فيها ايه
سمع موسيقى
اخترناك وبايعناك واحنا معاك الى ماشاء الله

03 September 2005

الساعة سبعة ونص

النهاردة صحيت الساعة سبعة ونص
كنت حاسس اني نمت كتير ومن زمان مانمتش كدة وفاكر حاجات بسيطة من حلم تقريبا كان كويس
ايه ده .. بس انا كان عندي معادين..اتخنقت وقلت انا مش من عادتي اني اتأخر او اضيع أي معاد
واحد الساعة اتنين الظهر وواحد الساعة ستة
طب وبعدين انا كدة قلبت المعادين وبرضه ماعلرفتش اصحى والدنيا فيها شمس
قمت غيرت هدومي بسرعة واتكلم في التلفون اعتذر لصاحب المعاد الاول واكلم صاحب المعاد التاني ويمكن الحقه
غيرت هدومي بسرعة ونكشت شعري
ونزلت على السلم وانا بهرول بس وانا نازل على السلم افنكرت اني لما صحيت وغيرت ونزلت ماشفتش أي حد من العائلة الكريمة
الراجل بتاع الأمن قالي صباح الخير .. صبحت عليه وقلت لغاية امتى هفضل انزل وانا شكلي نايم وصاحي وقت المغرب بعد كل الاحداث ماخلصت
رحت لغاية السنترال عشان اتكلم مكالمة موبيل ـ ألو طمني عليك ـ لقيت السنترال قافل وفي جنبه كام محل قافلين
وقفت وانا مستغرب وقلت هو النهاردة ايه بالظبط والدنيا عاملة كدة ليه مش زي كل يوم
ركبت العربية وولعت سيجارة وقلت انا اروح اتكلم من سنترال قريب من المكان اللي رايحه واكلم الشخص واخلص
طلعت على الشارع .. بس الشارع كان غريب عن كل يوم برضه .. الناس ماشية مكشرة وشكلهم مستعجلين او مش نايمين والدنيا أزحم من العادي والعربيات والاتوبيسات رايحة جاية بطريقة تنرفز اكتر من كل يوم
نزلت واتجهت ناحية السنترال التاني .. الغريب لقيته هو كمان قافل
طب وبعدين هو فيه ايه النهاردة
بالصدفة ببص في ساعة الموبيل
....
تنحت وفتحت عيني
لقيتها
8:00 AM
مع اني كنت نايم الساعة خمسة الصبح
ولعت سيجارة تانية وروحت قلت اشوف اي حاجة اتلهي بيها عالصبح
شكله هيبقى يوم طويل

27 August 2005

جواز بقرار سياحي

من كام يوم كنت في قاهرة المعز في رحلة قصيرة بغرض غير معروف
وكان بقالي فترة كبيرة مانزلتش القاهرة في الوقت ده من السنة ...كنت مستمتع في الاول بزحمة القاهرة وشوارعها
وكنت مستمتع وانا بتفرج على الناس اللي رايحة وجاية ووشوشهم من المبسوط للمخنوق للي بيتكلم واللي ساكت واللي ماشي واللي بيجري وهكذا
وبعد شوية لاحظت ملاحظة واستفسرت عنها من صديقي الاسكندراني اللي استلم شغله في القاهرة من فترة
وهي ان في كمية كبيرة من الخليجيين اكتر من كل مرة في القاهرة وتقريبا الكمية اللي شفتها منهم اكتر من اللي شفتهم في السعودية ايام ما كنت عايش هناك
ماردش على سؤالي ورد علية بانه قالي اسمع الخبر ده
من كام يوم كان في فرح هنا في فندق قريب من شغلى والفرح ده بتاع اتنين خليجيين من الكويت
مافهمتش ايه المشكلة في الموضوع ده ... ولما شاف مني اني مش متعجب ومستنيه يكمل القصة
وصحلي ان الفرح كان بتاع اتنين رجالة هيتجوزوا بعض ـ هنا بدأت اجمع ـ وكمل كلامه ان واحد منهم شكله مليان وجسم جامد ـ العريس ـ والتاني متدلع وشكله ناعم ـ العروس ـ وان الفرح اتعمل في فندق مشهور وان الفندق وافق على الموضوع ده عشان تنشيط السياحة وتحت شعار اللي ييجي منه احسن منه ... وان الفندق اعتبره فرح عادي وكان في فقرة رقاصة مشهورة ويقال ان ان الرقاصة يوم الفرح كانت بترقص بطريقة اشد من كل مرة في محاولة منها لتحريك اي حد من العريس او العريس ناحية الانثى ولكن لا حياة لمن تنادي واعتبرت انها غير موجودة بالخدمة واعتبرها العرسان انها كائن لايعترف بيه
رجعت بذاكرتي للفترة اللي كنت عايش فيها في المدينة المنورة واني سمعت كذا خبر زي ده وان اتعمل افراح في مناطق خاصة ابطالها راجلين بس كانت في الغالب بيحصل عليها كبسة من هيئة الامر بالمعروف والنهي عن المنكر وبيلموا الموضوع وبيقولوا انه محصلش اصلا
اللي فكرت فيه اني اوصل لدماغ اي حد منهم واعرف ايه اللي بيدور في دماغهم بالظبط .. يعني ايه اللي يخلي واحد يفكر انه يتجوز واحد .. طب مثلا لو حصل انهم ماتفقوش بعد كدة هل هيكون في طلاق وشهور عدة ويمكن المطلق يطالب بنفقة او نفقة متعة
وممكن الاول مثلا يطلبه في بيت الطاعة ويطلبه بالقانون بما ان الموضوع دخل في جواز وكلام جد .. ماحدش عارف يمكن يكون طلب ايده اساسا من ابوه وقدمله مهر وشبكة
بس كويس ان فنادقنا اتوفر فيها قسم خاص لافراح الاقطاب المتشابهة والهدف طبعا تنشيط السياحة وتحقيق الحرية الشخصية للمصريين وغير المصريين وتحقيق الديموقراطية والملوخية والمهلبية
وكما قال المثل مصر أم الدنيا
ومازال البحث مستمر عن ابوها

24 August 2005

ايه يابلاد ياغريبة

ايه يابلاد يا غريبة
عدوة والا حبيبة
في الليل تصحى عيونك
ونجومك مش قريبة
....
بلاد ماعرفش ناسها
ولا عارفاني بيبانها
ماليش شبر في اساسها
ولاطوبة في حيطانها
وخطاويا غريبة
...
عالم رايحة وجاية
وانا مين في مكاني
وايه اخر الحكاية
وايه اللي رماني
ياخطاويا الغريبة
...
دنيا والا متاهة
دايرة وبندور وراها
في صبحها ومساها
آها وراها آها
ياخطاويا الغريبة
...
ايه يابلاد ياغريبة
عدوة والا حبيبة
في الليل تصحى عيونك
ونجومك مش قريبة
...............................
اغنية اكتر من واقعية
غناء:
المطرب الناشئ الاسمر محمد منير

18 August 2005

فن الشحاتة

احيانا بنبقى مفلسين ومافيش في الجيب ولا سحتوت ومافيش اي حل للمشكلة غير انك تروح البيت وتنام وتنهي اليوم وتبدأ يوم تاني بعد كدة يمكن تفرج فيها وتبقى فلل
في حل تاني طبعا انك تشحت وتمد ايدك زي مابيقولو في الافلام العربي
في العادة كانت الشحاتة بمد الايد ومقولة لله يامحسنين او حسنة قليلة تمنع بلاوي كتيرة وتتختم في الاخر بدعوة حلوة للشخص اللي دفع وطبعا نظرة احتقار للي مابيدفعش
في معظم قصص الافلام العربي بيطلع الشحات في الاخر عنده كنز ومعاه ملايين _ في واحد شحاتة كانت بتقف في اشارة كنب بيتنا طلعلها واحد من شباك العربية الظاهر انه يعرفها وقاللها : ازيك يا... جبتي المرسيدس والا لسسة ؟؟؟
وعن طريق الطرق السهلة في الشحاتة الموضوع تتطور انها تبقى مهنة للي معندهوش مهنة وبدأ الموضوع ينتشر ويتزايد عدد الشحاتين في البلد وقربت يبقى ليهم نقابة خاصة بيهم رغم محاولات الحكومة في ظل رعاية رئيسنا اطال الله عمره , وبعد زيادة العدد مابقاش في اقبال من الناس انهم يساعدوا الشحاتين ظنا منهم انهم هياخد الفلوس عشان يدفع فاتورة الموبيل البيزنس
لذلك لازم يبقى في افكار جديدة ومحاولة التميز على اعتبار ان الشحاتة فن مش مجرد مهنة ـ شريفة ـ طبعا .. كام مشهد حصلو اثبتولي ان لكل مهنة فيها ابطالها
المشهد الاول:
راجل في سن الاربعين لابس جلبية بيضة وعمة وواقف في نص الشارع قريب من ابو ربيع في منطقة بولكلى ومعاه رغيف عيش فاضي وماعرفش لييه مغطي بيه عينه وبصوت شبه عالي ونظرة استعطاف للناس اللي في الشارع ... وبيقول : والنبي ربع جنييه اجيب فلفلاااية وبتكرار والحاح ... وقف واحد من الناس اللي ماشية وطلع جنيه... وقالو : خد يا عم روح هاتلك 4 فلافلات ولا تعمل في نفسك كدة
اخد منه الجنيه بعد ما دعاله من الدعاوي المحفوظة اياها ... وبعد ما الراجل اتدور ومكمل سكته
بيلتفت وراه لقى نفس الشخص بينادي تاني وبيقول والنبي ربع جنيه اجيب فلفلااية .. بصلو في نظرة تعجب
رد عليه الشحات وقالوا مافهاش حاجة لما يبقو خمس فلافلات
المشهد التاني :
راجل لابس بنطلون وقميص من بتوع الموظفين شكله في التلاتينات
وقفني في نص الشارع وقالى: ممكن كلمه لو سمحت
ايوة
معلش هعطلك شوية بس لكن فعلا انا مضطر اقول كدة وانت شكلك طيب ومش عارف ايه وهتفهمني
حوار في نفسي : شكله كدة شاذ والا اييه نظامه بالظبط
قلتله : اتفضل
قاللي : انا من المنصورة ونزلت هنا اسكندرية عشان اتتطمن على واحد قريبي واصيف يومين , وابتسم ابتسامه بلهاء مافهمتهاش وبعد كدة اتسرقت مني فلوسي ومعييش فلوس ارجع المنصورة تاني ...
والمطلوب مني ؟؟
انا عايز 2 جنيه بس عشان اقطع تذكرة وارجع بلدي ... انا عارف ان الاسكندرانية جدعان وانت شكلك اجدعهم....
مممممم
ماعرفش لييه طلعت 2 جنيه من جيبي وقلتله اتفضل ومشيت قبل مادعي وينافق والكلام ده
بعد يومين لقيت نفس الشخص ده جاي قدامي بهدوم متغيرة ـ افتكرته جاي يرجعلي فلوس ـ ووقفني بنفس الطريقة وبدأ يتكلم
... انا من طنطا ونزلت هنا اسكندرية................................
فكرت اني اقوله هات ال 2 جنيه بتوعي بس لقيت حل اسهل اني اسيبه وامش بعد ماشتمته في سري
المشهد الثالث:
شاب في اواخر العشرينات تقريبا شكله متبهدل ودقنه مش محلوقة
وقفني بعد السلام عليكم وقالي ينفع اطلب طلب صغير
اتفضل
لا مؤاخة يعني ياخويا انا عايز اطلب منك خمسة وتلاتين قرش ـ نسى يقول فقط لا غير ــ لو مافيهاش مانع
فكرت مع نفسي : طب اشمعنا 35 بالظبط وياترى لو اديته نص جنيه هيرجعلي الباقي
قلتله : مش فاهم
قاللي : خمسة وتلاتين قرش مش هيخسروا معاك يعني
دورت في جيبي وطلعت نص جنيه واديتهوله وكان منظري فعلا اني مستني منه باقي
اخد النص جنيه وحطه في جيبه وقالي تشكر يخويا... يبقالك.. واختفى
يمكن في يوم من الايام واحد من دول يبقى وزير مالية او رئيس وزراء

17 August 2005

من فترة قريبة كانت الايام مكررة او مازالت مكررة كلها شبه بعض والاحداث قليلة ومافيش اضافات
الغريب اني في الفترة دي فكرت في الكتابة
بس كتابة ايه بالظبط مااعرفش .. ماليش افكار او انتماءات سياسية ولا اهتمامات دينية بس لية افكاري الشخصية اللي مليانة فكسنة
فكرت اكتب مذكراتي
بس استغربت اني افكر اكتب مذكراتي اللي لا تغني ولا تسمن من جوع
نمت الصبح ... صحيت بالليل
اكلت او ما ماكلتش....لبست هدومي وسرحت شعري وبعدين نكشته
رحت القهوة ـ بدوية - قعدت ساعتين ...رحت الشغل
روحت البيت ...فتحت الكومبيوتر...فتشت في المطبخ حاجة ممكن تتاكل .... اتفرجت على روتانا سينما لغاية الصبح
دخلت انام
بعد كدة ممكن اعمل
copy
و
paste
على بقية الايام اللي جاية
مفيش احداث ومفيش شخصيات ـ تستحق تبقى اسمها شخصيات ـ جديدة دخلت في حياتي ... طب هييجي منين التغيير اذ كان الكوبي والبيست بقت تتطبق على فترات كبيرة بالشهور مش ايام بس
فكرة المذكرات طلعت فاشلة رغم انها كان ممكن تبقى حلوة لو من كام سنة فاتوا اللي كان بيحصل فيهم اي حاجة في اي حاجة
الظاهر ان الساقية ابتدت تلف قبل معادها

31 July 2005

يوم مر..ويوم حلو ـ أو يوم أمرـ



الصورة دي بتوضح وش من وشوش محمد منير وبتدي ايحاء ان اللي هيتفرج على الفيلم هيشوف بوليكا من محمد منير وسيمون زي افلام السبعينات كدة بس هيكتشف الحقيقة المرة لما يتفرج على الفيلم

من زمان وانا صغير مش فاكر صغير قد ايه بس كنت ساعتها بشبب عشان افتح الباب
كنت ساعتها عايش في السعودية وفي يوم كدة جاتلنا معونة عبارة عن شرايط فيديو جاية من مصر بدل اللي بيتعرض في القناة الاولى والتانية في السعودية قعدت قدام الشرايط واستربعت عالأرض وقعدت اقلب في اسماء المكتوبة على الشرايط معرفش ليه عجبني اسم ( يوم مر يوم حلو) غزيت الشريط جوة الفيديونن وحصل اللي حصل
اولا صوت منير في التتر بتاع الفيلم (اغنية تووت تووت) أداء وكلمات غريبة ... وبعد كدة بداية احداث الفيلم اللي بتدور حولين العيلة الفقيرة المصرية في المنطقة الفقيرة المصرية وكل اللي بيحصل من احداث بتؤدي بطريقة مباشرة او غير مباشرة الى الاكتئاب المزمن
واتربى عندي حاجة اني اكره الشخص اللي اسمه محمد منير ده او(عرباوي) من شخصيته اللي فعلا مثلها كأنه هو الشخص ده وخلاني اكرهه
بعد كدة ماجتش اي فرصة تانية اني اشوف الفيلم تاني

وعدت الايام وكبرت ومن فترة وقعت في ايدي الصورة ـ اللي فوق ـ ورجع بيا الزمن ـ فلاش باك ـ لليوم وانا صغير وانا بتفرج على الفيلم ده وكان كل همي ان احاول ادور على الفيلم ده على سي دي والا هارد والا ا حلة مطبخ حتى
من كام يوم مش فاكر كام بالظبط كنت قاعد قدام التلفيزيون ومش جايلي نوم قدام فيلم فكسان مش فاكره لغاية الساعة 9 الصبح وبعد ماخلص كنت حاسس اني عايز انام قلت اروح اشرب وبعد كدة انام
وانا راجع ببص على روتانا سينما (مش هتقدر تغمض عنيك) وماصدقتش المكتوب ـ بعد قليل..يوم مرويوم حلو ـ اكتشفت ساعتها ان كلمة مش هتقدر تغمض عنيك عندهم حق فيها اتثبت قدام التلفيزيون واخدت الوضع وقعدت اتفرج على الفيلم
المشكلة مش في كآبة الفيلم بس المشكلة انه بين الحين والاخر كان بيرجعني لنفس اليوم وانا صغير وقاعد بتفرج عليه
شخصيات الفيلم كانت فعلا محطوطة في مكانها الصح من اول فاتن حمامة وسيمون وعبلة كامل وبنتها خطيبة عرباوي والبنت العيانة وابنها الصغير .. لغاية شخصية عرباوي اللي هو منير ... من اول مشهد لظهور منير وهو بيضرب العيل الصغير في الورشة بتاعته وانا نسيت انه منير اللي اعرفه وعشت معاه انه عرباوي وهو بيتكلم معاهم بطريقته المستفزة وهو بيتكلم عن ماضيه مع اهله وبيطلع عقده النفسية وهو بيطلب التلاجة عشان يشرب المية ساقعة وياكل البطيخ وهو متلج قبل مايروح الورشة وهو بيتجوز في الفرح الشعبي وبيدخل عش الزوجية والمشهد وهو بياكل البطيخ بالطريقة الغريبة دي والمشهد وهو معلق اخو مراته وبيضربه والمشاهد اللي كان بيخون فيها مراته مع سيمون ـ اخت مراته ـ لغاية اخر مشهد ليه وهو بيهرب بعد ما مراته كشفت الخيانة
ومشاهد فاتن حمامة وهي بتلم الفلوس عشان اولادها وفي عز كل ده بتساعد اهل حتتها وتقف معاهم في افراحهم واحزانهم والمشهد اللي راحو فيه يستلمو الجايزة من التلفيزيون هي واولادها ... المشاهد كلها صادقة ومؤثرة بطريقة غريبة لدرجة اني كنت بفكر اني عايش معاهم ومعاصر الاحداث ونفسي اساعد أو اتصرف عشان اي حد فيهم

الفيلم كان سبب لاكتئابي الفترة الصغيرة اللي فاتت وفكرني بأيام وانا صغير وايام السذاجة

انا بقترح ان الفيلم ده يتكتب في اعلانه ( لراغبي الاكتئاب ) زي (كلمة للكبار) فقط كدة
وفي الاخر قعدت ادور على اليوم الحلو في الفيلم لكن للاسف مالقيتش حتى لحظات

28 July 2005

سلة مهملاتي

بقالي كتير مافتحتش سلة مهملاتي او بالعربي الزبالة عشان ارمي جواها شوية حاجات زي كل فترة
محتاج ارمي في الزبالة شوية شخصيات معرفش لييه كنت مديلهم مكان على الهارد الدماغي ومن زمان ماعملتش جرد ورميت شوية الشخصيات اللي مالهاش لازمة اللي عنيها مليانة لؤم وقلوبها مليانة كره وحب للذات ودماغها اللي بتفكر في اي كذب وخلاص وحوارات تعبانة

زهقت من الشخصيات المريضة وفعلا محتاج ارمي في الزبالة
ومن زمان ماحستش ان اليوم اربع وعشرين ساعة من حقي اعيش في اي جزء من اليوم
ومن زمان ماقعدتش في القهوة بالساعات لغاية ماحس اني بقيت جزء من المكان
بقالي فترة مابسمعش منير بروقان زي زمان وماعملتش ازعاج في البيت
فعلا محتاجين نفتح سلة المهملات ونرمي اللي مش عاجبنا وعامل مشاكل مع الهارد والويندوز والبروسيسور والرامات واول حاجة الشخصيات اللي مش من حقها تفضل عالهارد وخليته مليان باد سيكتورز
وعايز ارمي الكأابة والملل والايام المكررة الي شبه بعض
عايز ارميها كدة مرة واحدة

وفي الاخر اعمل ريستارت

19 July 2005

محاولات

الفترة دي بحاول الاتجاه لمشاكلي الشخصية وابعد شوية عن المشاكل اللي من الناس محاولا عدم تطبيق مبدأ شمعة تحترق من اجل الاخرين

وحاولت بطريقة هندسية اني اقسم الحياة بشكل عام وزي ماتعلمنا في الكلية عشان اشوف المشكلة جاية من انهي قسم بالظبط

الحياة الاجتماعية
بعد عن البيت واتواجد في القهوة او غيرها مع مجموعة الاصدقاءاللي ماليين حياتي بحلوهم ومرهم مع مراعاة تجاهل اختلاف طرق التفكير

الحياة العملية
شغل في السيبر وقعدة قدام شاشة الكومبيوتر تمان ساعات وملل من اشكال الحروف والارقام رغم ادماني ليها وعدم القدرة على البعد عن شاشة الكومبيوتر يوم واحد

الحياة الهندسية
بعد تجربة اعادة السنة قبل الاخيرة -لاول مرة في حياتي- من الكلية يتجه تفكيري اني اخلص من السنة الجاية الاخيرة واتحول الى مهندس لان جالي احساس اني اتحشرت في كلية هندسة وبقيت معقد نفسيا بسببها


الحياة الموسيقية
التحيز التام لمزيكا محمد منير شكلا ومضمونا واستمرار الوضع كلاعب مزيكا (درامر) ناشئ رغم بعض المعوقات

الحياة العاطفية
بعد هدم مبدأ قلبي مساكن شعبية بعد ان كان يتربع فيه من كان ولم يعد الان مابقاش في فكرة لبناء اي حاجة
الحياة الاقتصادية
متدهورة احيانا ومزدهرة احيانا ولكن عادة في المعدل المتوسط

بعد ماوصلت لدول زهقت من التقسيم وشايف ان بدايات المشكلة ان في بعض الاقسام واخدة حق اكتر من اقسام تانية او ان كل جزء فيه مشكلة مأثرة على اجزاء تانية و المفروض ان يكون في تداخل بينهم يوصلهم لدرجة التوازن على الاقل بحيث يكون مجموعهم كلهم على بعض قسم واحد لايتجزأ وخالي من المشاكل او مسبباتها..مع مراعاة ان كل قسم ياخد حقه بالعدل..بس هل التقسيم ده صحيح وهل محاولة حل المشاكل صحيحة ولا احنا مانعرفش نعيش من غير مشاكل

12 July 2005

الحضارة


حضارة سبع الاف سنة....اللي صدعنا بيها نفسنا وصدعنا العالم كله بيها
واللا يمكن ده برج بيزا المائل وده الفرع بتاعه في مصر
فعلا عمار يامصر

10 July 2005

كفاية يا منير


مقلب جديد من مقالب الاستاذ محمد منير
اصحى من النوم يوم الخميس وباتمنى انه مايبقاش يوم زي كل يوم والمفروض انه يكون فيه حدث اللي هو ان شريط منير نزل وهشتريه وكنت باتمنى انه يطلع كويس او على الاقل مقبول بعد فضيحة احمر شفايف واللي مش فاهم لغاية دلوقتي هو ليه اللي بيعمله ده و ايه اللي في دماغه بالظبط
رحت عند محل الشرايط في سموحة اللي كنت متفق معاه اني هشتري منه الشريط ويديني معاه بوستر هدية اعلقه جنب اخواته في غرفتي ....وانا بقرب من المحل لقيت البوستر اللي في وش منير متعلق ...قلبي رفرف وحسيت انه هيبقى يوم في حدث وهسمع فعلا الشريط النهاردة
دخلت المحل وسلمت على الراجل كأني داخل اشتري ساندوتش
ولكن حصل ان الراجل بصلي بصة الدكتور اللي فشل في عملية ولادة وضحى بالأم عشان الجنين
وقاللي للاسف الشريط مانزلش ....بصيتله بصة الطالب اللي سقط في الامتحان وقلتله لييه اييه اللي حصل امال ايه اللي نزل
قاللي نزلو البوستر اللي فيه وش منير ... بصيتله بغضب وقلتله هو هيذلنا يعني على الشريط مرة رجله ومرة وشه ومرة شعرهناقص بوستر لملابسه الداخلية .... هيقول اييه زيادة يعني بعد اللي قالو من ايام علموني عنيكي
رجعت القهوة وانا مخنوق وانا بسلم على صديق بطريقة متأففه
وبقوللو عفويا....كفاية يا منير ...كفاية تهييس ومقالب

02 July 2005

بوستر شريط محمد منير الجديد

انا في انتظار شريط (الاستاذ) محمد منير

انا بكره لقب الكنج او الملك اللى بيلقبوه بيه

اتمنى ان اغاني الشريط تتطلع قوية في مستوى البوستر

19 June 2005

الساحرة المستديرة والمستطيل الاخضر

لم يعد غريبا عليا ان ادخل قهوتي المفضلة في وسط الاسكندرية (بدوية) وأرى جميع من في المكان من زباين او عاملين بالمكان بلا حركة وبلا حياة كأني دخلت متحف الشمع حيث ان الجميع مثبت في مكانه وجميع العيون موجهة الى التلفيزيون بكامل الانتباه والمتابعة خوفا من ان تفوت عليهم لحظة مما يحدث
وعندما انظر الى التلفيزيون في استفهام عما يدور فيه هل هو فيلم (ثقافي) للمراهقين أو هو شيء ما عجيب يجعلهم مثبتين بهذا الشكل فأكتشف انه ( ماتش كورة ) فتعود ذاكرتي الى اليوم السابق فاكتشف انه لا داعي للتعجب فهذا المشهد يتكرر منذ 3 سنين تقريبا
والغريب ان أي ماتش كورة لا يفوت سواء كان الدوري العام المصري بفرقه الهزيلة والتي تدخل المنافسة لمجرد ملأ المكان أمام الاهلي والزمالك اللذين يتكونوا من افضل لاعبين الجمهورية ودورهم محصور ان يهزموا بقية الفرق الاخرى لكي ينالوا اعجاب جماهيرهم ومدربهم لحين ميعاد لقاء القمة بينهما والذي ينتظره كل انسان في انحاء المحروسة
وغالبا بعد الانتهاء من مباريات الدوري العام المصري (الهزيل) يتم البحث في قنوات الدش عن ماتش اخر في اي منطقة في العالم فيتم الوقوف عند الدوري الانجليزي ثم الاسباني ثم بطولة اوروبا , لم يبقى الى الدوري الهندي مثلا (الغريب ان الفرق بين الكورة الاوربية أو العالمية والكورة الصرية فرق السما والارض) ولكن يقال يجب ان تتفرج على كورة بلدك طبعا ( أمال ايه انت مش مصري والا ايه) وبالتالي لم يعد هناك مشجعين اهلي وزمالك فقط بل اصبح هناك مشجعين ومتعصبين ايضا للقرق الاوربية من مانشستر وبرشلونة وريال مدريد وهكذا ومايحدث بالنسبة لجماهير الدوري المصري يحدث ايضا بين مشجعين الكورة الاوربية
من استغرابي وتعجبي لما يحدث واهتمام البشر الغريب بالساحرة المستديرة وعدم اهتمامي بها رغم الفراغ الذي اجد منه كثيرا كنت اخاف ان يكون العيب مني أو اني مريض وغير طبيعي
حاولت ان استفسر كنوع من انواع العلم بالشيئ وسألت صديق من مشجعي الاهلي
مالذي يجعلك تشجع الاهلي وتجعل حياتك و اغلب تفكيرك انك تنتظر ماتش الاهلي سواء كان مع فرق الدوري أو اليوم المقدس لكم وهو يوم ماتش الزمالك العدو اللدود ؟
كانت اول اجابة وكانت نابعة من فيلسوف ومفكر سيقنعني انه لابد ياصديقي العزيز ان يكون عندك انتماء الى شيء معين أو ستكون عايش في هذه الحياة وانت غير منتمي الى شيئ
من الاجابات الاخرى اننا نعاني من الفراغ وانا لا اريد التفكير لان التفكير سيوصلنا الى الاكتئاب
ومنهم من قال ان اللي مصبره على هذه الحياة ويجعلها وردية في نظره هو انتصارات الاهلي المتواصلى
سألت سؤال اخر بطريقة متفوكسة .. ولكن مالفكرة من ان اجلس امام التليفزيون بالساعات لكي اتابع مجموعة من الناس كل هدفهم ان يضعو الكرة داخل ال 3 خشبات كما يقولون ... ده غير الحديث قبل الماتش وبعده والذي ينتهي احيانا بخناقة
لم استقبل اجابة ولكن استقبلت نظرات فهمت منها اني مجنون ولا استحق ان يتركوا مايدور امامهم لكي يتحدثوا معي
اخذت مكان في ركن القهوة وجلست اتابع تماثيل متحف الشمع

13 June 2005

العاب

مجموعة افكار تدور في دماغي من اول ماستلمت الشغلانة في السيبر
ومن اول ماشتغلت مع صديقي صاحب السيبر وانا اكتشفت مجموعة من الناس اللي كنت اعلرف انهم موجودين في الحياة لكن لسبب غير معروف كنت ببتعد عن الشخصيات دي وحتى الشخصيات اللي اعرفها كنت بتعمد من حين لاخر اني ارمي عليهم الكلام بطريقتي المتفوكسة واتعمد اني احطملهم امالهم واحلامهم لما يكسبو ماتش فيفا او سباق نيد فور سبيد واحسسهم انهم في الطراوة ومش داريين بالدنيا
ومحاولا طبعا تفادي سؤالهم امال انت يعني بتعمل ايه في الحياة ؟
امبارح فضلت لغاية الساعة 6:30 صباحا مستني شوية شباب تتراوح اعمارهم من ال 25 لل 27 قاعدين قدام شاشات الكومبيوتر اللي بيلعب فيفا واللي بيلعب نيد فور سبيد لاكتر من 6 ساعات تقريبا
وانا قاعد على الجهاز المتحكم في الشبكة بحرق في سجايروبسمع حبيبي محمد منير وزهقت من كتر ماتصفحت الصفحات اللي اعرفها ومن كتر ماتكلمت مع ناس على المسنجر
قعدت افكر ايه اللي يخلي شوية الناس اللي جوة دول يهتمو قوي بالالعاب دي رغم سنهم الكبير وخليهم يقضو امتر من 6 ساعات بيلعبو وبالاهتمام ده وبالتعصب ده ... ممكن يكونوا هايفين..ممكن يكونوا بيهربوا من حياتهم .. بس برضه ايه اللي يخليهم يخلصوا شغلهم ويسيبوا اي حاجة تانية وييجوا يلعبوا ؟ الموضوع محيرني
طب وانا مالي مايلعبوا فيفا واللا يموتو بعض حتى المهم انهم بيدفعوا في الاخر تمن كل ساعة وبيمشوا وهما مبسوطين وبيتواعدوا واللي خسروا النهاردة بيتوعدوا للي هزموهم انهم بكرة هيردوا الخسارة وهتكون تقيلة

عامة وانا مالي مش يمكن يكونوا هما اللي صح وانا غلط وفي الاخر هما مبسوطين وانا مستغرب من انبساطهم بس مليش حق اقولهم انهم غلط