23 November 2005

النهاردة 23

النهاردة 23 من شهر 11 اللي معروف باسم نوفمبر
والنهاردة انا كدة بقالي 23 سنة في الدنيا الغريبة العجيبة دي
الغريب ان السنة دي بالذات مش ستني من حد يقولي كل سنة وانت طيب بحس انها كلمة مش مفهومة او مش معبرة ولكن بتعبرلي ان في حد فاكر تاريخ ميلادي ودي حاجة كويسة بالنسبة للزمن اللي احنا مرميين فيه
الطريف في الموضوع ان انا مش عارف سن ال 23 ده بيتعمل فيه بالظبط يعني ايه المكان او الوظيفة اللي لازم اقوم بيها وانا في سن 23 واساسا انا مش باعترف برقم تلاتة من الاصل لانه بيفكرني بيوم التلات اللي انا مش عارف ايه لازمته في الاسبوع وعمره ماكان في يوم تلات سعيد...
في كل يوم لازم افتكر موقف حصل..ذكرى حلوة أو سيئة كل اللي بعمله اني باتكلم عن ذكرياتي بالفعل الماضي تقريبا عمري مابحاولش اصنع اكتر او احس ان في مستقبل بل انه بالنسبة ليه شيء مجهول ولا اهتم اني اتكلم عنه أو احس ان لسة في أيام هتيجي تاني
لما باقف قدام المراية للحظات باحس اني شايف شخصين عايشين مع بعض واحد منهم عجوز ومكحكح وعاش الدنيا بالطول والعرض والارتفاع وعمل كل حاجة نفسه فيها وعنده كمية لا بأس بها من الحكمة وكمية كبيرة من الخبرة واكتفى من الدنيا ومش عايز يعمل حاجة تاني
والتاني طفل صغير يمكن لسة ماكملش الست سنين نفسه يكبر ويحلم ويحب ويعيش الحياة وعنده أمل في بكرة وشايل كمية لابأس بها من البراءة والسذاجة في نفس الوقت
في حين ان هناك اختفاء تام للشخص اللي يفترض انه يكون حقيقي وهو الشخص اللي في العشرينات
مش عارف ازاي بيت يبقى عايش فيه راجل عجوز عنده ستين وطفل صغير عنده ستة بس طب هيتفاهموا مع بعض ازاي
العجوز بيحسد الطفل وبيتمنى انه يرجع لزمان تاني والطفل نفسه يكبر عشان يعيش الدنيا ويتخلص من قيود الطفولة
واللي في النص مرحلة مختفية وتايهة او غير موجودة على الارجح


ويبقى السؤال : ايه اللي بيتعمل في ال 23 أو يعني ايه 23 اساسا ؟؟

10 comments:

نــــــــدي said...

23 يعني ايه
اقولك انا يا سيدي
يعني 2 وجنبها 3
او 3 وجنبها 2 مش هتفرق
المهم انت
عقبال ال4 وجنبها 2

سلامٌ عليكِ said...

ربنا يبارك لك فى سنين عمرك :)

S H E B A K said...

كل سنة و انت طيب للطفل اللى عندة ست سنين
و ربنا يطولنا فى عمر العجوز ابو ستين سنة
الاتنين مع بعض عاملين حاجة جامدة اسمها فوكس المتفوكس

HERA said...

habby birthday
عشان انت بتزعل من كل سنه وانت طيب
وبعدين 23 سنه ممكن تلحق تعيش حياتك قبل ما الوقت يفوت من غير ماتحس

SaSo said...

صدمه,مش كده
كل ماتفتكر ,-أو حد يتغابى ويفكرك- كأنه متعمد يغيظك او يشتمك
ياأبو 23

Anonymous said...

هى اغرب واقصى مرحله مرحلة العشرينات بين انك لسه فى كليه ومخلص طاظا يعنى وبين عايز تكون نفسك وتعمل وبيت وعيله الله اعلم ممكن يحصل فيها ايه الفتره دى على العموم انا برده فى نفس السؤال وتاهيه اروح فين ولا اجى منين لما يكون فى شغل وتخطيط كله بيخبط فى كله ولما يكون فى عطله يبقى الدنيا كلها حوليك بتصفر من كتر الهوا

Misrdream said...
This comment has been removed by the author.
موجه said...

ممكن اعلق على البلوج النهارده؟؟؟..
وعلى البوست ده تحديدا؟؟؟؟؟؟؟......

بص بقي يابتاع الهندسه يامفرفش انت
ال23 دول عباره عن تحصيل وحصاد للخبرات اللى انت مريت بيها
افترض مثلا ان كل خبره اكتسبتها اضافت لسنك يوم زياده
يبقي المفروض دلوقت انك تضيف ايام كمان باكتساب خبرات اكتر

وافتكر دايما ان فيه بكره
واوعي تنسي ان بكره اوحش من النهارده ( بالظبط زي ما النهارده اوحش من امبارح بكتيييييييييييير)

البساط said...

اليلام عليكم
الدنيا كفاح وأمل وعمل وتخطيط
لا تيأس

Unknown said...


شركة تنظيف خزانات بالرياض
شركة عزل خزانات بالرياض

شركة مكافحة  حشرات بالرياض
شركة رش مبيدات بالرياض

شركة مكافحة النمل الابيض بالرياض